Lea u vra dje brenda ambienteve të shkollës në Graz të Austrisë

Flet gjyshi i vajzës nga Kosova që humbi jetën në Austri, tregon si e kuptuan lajmin

Vajza nga Kosova, Lea Bajrami, është në mesin e dhjetë viktimave të sulmit me armë që ndodhi të martën në një shkollë të mesme në Graz të Austrisë, përcjell albinfo.ch.

Gjyshi i të ndjerës, Muhabi Bajrami, ka dhënë detaje se si e morën vesh dhe si e pritën lajmin për vdekjen e saj.

“Jemi të shqetësuar, neve na ka ardhur një lajm trishtues. Kjo është 15-vjeçare, në shkollë private ka qenë, nxënëse e shkëlqyeshme. Unë e kam mbesë. Ka ndodhur në mëngjes.”

“Ne kemi dëgjuar që ka ndodhur, edhe të gjithë na kanë thirrur dhe na kanë pyetur: ku është Lea? Se emrin e ka Lea, edhe e kuptuam që është ajo. Shpresuam shumë që nuk është e vërtetë, por në orën 2 djali, djali im, pra babai i vajzës, më tha: ‘Baba, Lea na la’”, ka rrëfyer ai.

Të paktën 10 persona, përfshirë autorin e krimit, janë vrarë mëngjesin e së martës pas një sulmi me armë në një shkollë të mesme në Graz, një nga qytetet më të mëdha të Austrisë.

---