Turqia me rregulla të reja në aeroplanë: Një gabim i vogël mund të kushtojë 60 euro

Nëse po planifikon një fluturim drejt Turqisë, ka një rregull të ri që duhet ta kesh parasysh  dhe nuk bëhet fjalë për bagazhin apo pasaportën. Tashmë, nëse zgjidh rripin e sigurimit dhe ngrihesh nga vendi para se avioni të ndalet plotësisht, mund të përballesh me një gjobë prej rreth 60 eurosh.

Kjo është pjesë e një rregulloreje të re nga Autoriteti Turk i Aviacionit Civil (SHGM), që synon të përmirësojë sigurinë dhe disiplinën gjatë fluturimeve. Ekuipazhet e avionëve turq kanë raportuar shpesh se pasagjerët nxitojnë të ngrihen dhe të hapin ndarjet e bagazheve menjëherë pas uljes, duke injoruar sinjalet e sigurisë, transmeton albinfo.ch.

Por nga tani e tutje, kjo sjellje do të ketë pasoja financiare. Turkish Airlines e ka marrë seriozisht vendimin dhe ka udhëzuar stafin që të paralajmërojë pasagjerët: rripi i sigurimit duhet të qëndrojë i lidhur deri në momentin që avioni parkon dhe shenja e dritës fiket.

Për më tepër, është ndaluar edhe ngritja e hershme në korridor apo tentimi për të kaluar para të tjerëve gjatë zbritjes. Edhe kjo mund të rezultojë në gjobë  edhe nëse rripi është zgjidhur dhe sinjali është çaktivizuar.

Kompanitë ajrore që nuk zbatojnë këto rregulla, gjithashtu rrezikojnë ndëshkime administrative. Kjo masë është një përpjekje për të rikthyer rregullin në kabinën e avionit dhe për të shmangur kaosin e zakonshëm që shpesh ndodh pas uljes.