Nga e-gates te Erasmus: Çfarë u ra dakord në marrëveshjen e re pas Brexit mes BE-së dhe Mbretërisë së Bashkuar?

Pesë vjet pas daljes nga BE-ja, Mbretëria e Bashkuar dhe Bashkimi Evropian kanë rënë dakord për një sërë masash që synojnë të përmirësojnë marrëdhëniet mes tyre dhe të lehtësojnë jetën e qytetarëve në të dyja anët e Kanalit. Marrëveshja u shpall pas samitit të parë BE- Mbretëri e Bashkuar të mbajtur në Londër.

Çfarë përfshin marrëveshja?

Përdorimi i e-gates për britanikët që udhëtojnë në Evropë: Qytetarët britanikë do të mund të përdorin më shumë pika të automatizuara në kontrollin kufitar, duke shmangur radhët e gjata. Nuk do të ketë pengesa ligjore për përdorimin e këtyre pikave nga udhëtarët britanikë pas implementimit të sistemit të ri të hyrje/daljes së BE-së.

Pasaportat për kafshë shtëpiake: Është arritur një marrëveshje për të thjeshtuar udhëtimin e kafshëve shtëpiake midis MB-së dhe BE-së, duke eliminuar nevojën për certifikata shëndetësore për çdo udhëtim.

Rikthimi në Erasmus+: Mbretëria e Bashkuar ka shprehur angazhimin për t’u ribashkuar me programin Erasmus+, duke u dhënë të rinjve britanikë mundësinë për të studiuar dhe jetuar në vendet e BE-së.

Skema për lëvizjen e të rinjve: Do të krijohet një skemë që lehtëson lëvizjen e personave deri në 30 vjeç për studime, punë, vullnetarizëm apo udhëtime në afat të kufizuar kohor. Skema do të përfshijë një vizë të posaçme dhe do të ketë kufizime në numër dhe kohëzgjatje, përcjell albinfo.ch.

Traktati për mbrojtje dhe siguri: Mbretëria e Bashkuar do të mund të marrë pjesë në fondin e ri të mbrojtjes së BE-së me vlerë 150 miliardë paund dhe palët kanë rënë dakord për bashkëpunim të mëtejshëm në çështjet gjeopolitike, përfshirë mbështetjen për Ukrainën.

Lëvizja e mallrave dhe eksportet ushqimore: Do të thjeshtohen procedurat për eksportin dhe importin e produkteve ushqimore, duke lehtësuar tregtinë, veçanërisht për sektorët britanikë të mishit dhe pijeve.

Zgjerimi i qasjes për flotën peshkare të BE-së në ujërat britanike: Lejet ekzistuese do të zgjasin deri në vitin 2038.

Njohja e kualifikimeve profesionale dhe hyrja për qëllime biznesi: Do të krijohen dialogë të posaçëm për të përmirësuar zbatimin e marrëveshjes tregtare dhe njohjen e kualifikimeve profesionale.

Migrimi i parregullt: BE dhe MB do të rrisin bashkëpunimin në trajtimin e emigracionit të paligjshëm dhe parandalimin e abuzimit me sistemet e vizave.

Bashkëpunim në drejtësi dhe punë të brendshme: Britania do të ketë qasje më të gjerë në disa baza të të dhënave të BE-së, përfshirë ato të imazheve të fytyrës, përveç të dhënave ekzistuese të ADN-së, shenjave të gishtave dhe regjistrimeve të automjeteve.