Posta zvicerane do t’i paguajë Konfederatës dividendë prej 100 milionë CHF këtë vit

(KEYSTONE/Alessandro Della Bella)

Posta zvicerane njoftoi të enjten në përfundim të mbledhjes së saj të përgjithshme vjetore se do t’i transferojë Konfederatës shumën prej 100 milionë CHF. Kjo shumë do të shkojë tërësisht në arkën federale.

Sipas një deklarate për shtyp të publikuar nga kompania, dividendi do të shpërndahet nga fitimet e disponueshme për vitin financiar 2024, që kapën shumën prej 324 milionë CHF, mbi një të ardhur operative prej rreth 7.6 miliardë CHF. Llogaritë vjetore të kompanisë u prezantuan në mesin e muajit mars, transmeton albinfo.ch.

Në mbledhjen vjetore, Konfederata Zvicerane, si aksionari i vetëm i Postës Zvicerane, miratoi të gjitha propozimet e bordit drejtues, përfshirë rezultatin financiar. Po ashtu, anëtarëve të bordit u është dhënë shkarkim i plotë për vitin financiar 2024.