Mbrëmje e madhe boksi në Austri, boksierët shqiptarë të gatshëm për spektakël

Eventi i shumëpritur i boksit do të zhvillohet më 15 mars 2025 në Südstadt

Një mbrëmje e madhe e boksit do të zhvillohet të shtunën me 15 mars në Südstadt, shkruan albinfo.at.

Ky event garanton përsëri duele të jashtëzakonshme, me gjithsej 10 ndeshje të nivelit të lartë.

Erion Veseli, Lorent Murati, Mergim Asani dhe Patriot Behrami, do të debutojnë në boksin profesionist këtë mbrëmje dhe do të ngjiten në ring për ndeshje me 4 raunde dhe do të dëshmojnë nëse janë gati për sfida ndërkombëtare.

Ndërkohë, boksit profesionist për femra nuk do t’i mungojë përfaqësimi: Patricia Lager do të zhvillojë ndeshjen e saj të katërt si profesioniste kundër Fani Vilicic nga Bosnja dhe Hercegovina.

“Të rinjtë premtues Yuris Sakunts, Kushtrim Tahitukaj dhe Ndrichim Emini do të përballen me kundërshtarë nga Sllovakia, Kroacia dhe Uganda në ndeshje me 6 raunde. Një tjetër moment i rëndësishëm i mbrëmjes është Kampionati i Austrisë në peshën e rëndë! Habib Vuqiterna dhe Ramiz Hadziaganovic do të luftojnë në një duel me 10 raunde, ku vetëm njëri do të dalë kampion i ri i Austrisë” ka thenë për albinfo.at, Shpetim Shala, organizator i këtij eventi.

Finalja e madhe e mbrëmjes: Bernardin „BJ“ Jakaj kundër Joel „El Torro“ McIntyre.

Në një përballje me 8 raunde, Jakaj do të ketë përballë ish-kampionin britanik të peshës gjysmë të rëndë. Një sfidë vendimtare për të ardhmen e tij në skenën e madhe të boksit. /Albinfo.at

 

---