Iu dha lamtumira e fundit aktorit Adem Muji

Në një ceremoni homazhi në Gjenevë, të përgatitur nga familja dhe miqtë e dashamirët e tij, u kujtua me emocion jeta dhe vepra e artistit

Të premten që shkoi, më 20 dhjetor iu dha lamtumira e fundit, në Gjenevë, aktorit dhe veprimtarit Adem Muji, i cili ishte ndarë nga jeta, më 16 dhjetor, në moshën 66 vjeçare.

Po atë ditë, në një ceremoni homazhi në “chapelle de l`Ange”, të përgatitur nga familja dhe miqtë e dashamirët e tij, u kujtua me emocion jeta dhe vepra e artistit. Takimin e moderoi aktivistja dhe poetja, Mirishahe Limani – Hiler, mike e familjes Muji, ndërsa dy nga fëmijët e të ndjerit, Iliri dhe Afërdita evokuan kujtime për babanë e tyre.

Me fjalë dashurie për gjyshin e tyre, në këtë takim përkujtimor janë paraqitur edhe nipërit dhe mbesa: Noli, Andi dhe Adea.

Adem Muji ishte i lindur më 25 prill 1958 në fshatin Bresalc të komunës së Gjilanit dhe kishte mbaruar studimet në Universitetin e Prishtinës. Krahas pjesëmarrjes në aktivitetet e kohës, ai, duke filluar nga vitet `80 u aktivizua në jetën teatrore dhe konkretisht, në Teatrin e Qytetit të Gjilanit, ku mbahet mend për një sërë rolesh të suksesshme.

Në rrethanat e vështira, të krijuara në fillim të viteve `90 sikur shumë moshatarë të tij, edhe ai u detyrua të braktiste Kosovën dhe u zhvendos në Zvicër, në Gjenevë. Këtu, për të mbajtur familjen, atij iu desh të punonte punë të rënda, si në ndërtimtari, hoteleri etj., ndërsa aktiviteti i tij i fundit profesional ishte si asistent social në Hospic General. Në këtë vend pune, siç e thotë zonja Limani-Hiler “ai, shtegtari migrues, tani ishte i angazhuar në pritjet e emigrantëve më të rinj që vinin nga atdheu i tij, apo edhe nga vise të tjera të Ballkanit”.

 

Megjithëse në këto kushte ai nuk mund t`i përkushtohej ëndrrës së tij, teatrit, Adem Muji nuk qëndroi duarkryq: ai përgjatë disa viteve u angazhua në shoqatën kulturore të shqiptarëve të Gjenevës “Igballe Prishtina”. Me këtë shoqatë ai ka realizuar, veç tjerash edhe disa shfaqje teatrore.

Pak vite pas luftës, ai u kthye për një kohë në Kosovë, ku u angazhua në një serial të njohur të atyre viteve me titullin “Qyteti pa lumë”, me regjisor, Ilir Kabashin.

“Ndërkohë gjendja e tij shëndetësore përkeqësohet, prehja e tij ishte dhe mbeti arti. Ai së fundmi, ishte i angazhuar për të vënë në jetë një projekt të ri “Adami dhe Eva”, përmes teatrit modern”, thotë veç tjerash, zonja Limani-Hiler. ”Artistët lënë gjurmë që të mos i humbim rrugët”, ka përfunduar ajo fjalën e saj lamtumirëse për artistin.

 

---