Së shpejti hiqet taksa në kufi për mërgimtarët

Qeveria e Kosovës shumë shpejtë pritet të heq pagesën prej 35 euro që njihet si kartoni i gjelbër, taksë kjo që ngarkohen mërgimtarët prej vitesh sa herë që shkojnë në Kosovë

Kryetari i Komisionit parlamentar për Buxhet dhe Financa, Naser Osmani, ka thënë se janë duke i shikuar të gjitha mundësit ligjore që kjo pagesë të hiqet.

Osmani ka shtuar se ekziston baza ligjore dhe se për këtë është konsultuar me guvernatorin e Bankës Qendrore, Bedri Hamza, nga i cili ka kuptuar se ekzistojnë mundësitë.

Sipas tij, kompanitë e sigurimit janë ato që kanë prishë marrëveshjen me Byronë e Kartonit të gjelbër.

“Në prag të nënshkrimit të një marrëveshje me Byronë e Kartonit të gjelbër kompanitë tona të sigurimeve e kanë prishur për arsye se atyre nuk iu konvenon. Kjo që iu bëhet bashkatdhetarëve tanë është e padrejtë. Çdo vit Kosova nga remitancat përfiton të hyra 600 deri në 700 milionë euro dhe nuk është në rregull që këtyre njerëzve të iu merret 35 euro në kufij e që krejt kjo është një vlerë 1 deri në 2 milionë euro”, ka deklaruar Osmani, transmeton albinfo.ch.

Që të hiqet taksa prej 35 eurove me të cilën ngarkohen mërgimtarët sa herë që hyjnë në Kosovë janë pajtuar edhe anëtarët e tjerë të komisionit parlamentar.

---