Gërvalla në Austri, do të marrë pjesë në takimin “Miqtë e Ballkanit Perëndimor”

Donika Gervalla, FB

Ministrja e Punëve të Jashtme dhe Diasporës në Kosovë, Donika Gërvalla, është nisur për në Austri, me ftesë të homologut të saj, Alexander Schallenberg.

Sipas njoftimit për media, Gërvalla do të marrë pjesë në takimin e grupit “Miqtë e Ballkanit Perëndimor”, i cili përveç Austrisë, përfshin edhe gjashtë shtete të Ballkanit Perëndimor, edhe Italinë, Kroacinë, Çekinë, Greqinë, Sllovakinë dhe Slloveninë, transmeton albinfo.at.

Tutje, në njoftim thuhet se ky takim synon përkrahjen e shteteve të Ballkanit Perëndimor për një integrim sa më të shpejtë në strukturat e Bashkimit Evropian.

“Në këtë takim ministrja Gërvalla do të paraqesë qëndrimet e Republikës së Kosovës rreth sigurisë në Evropë dhe në rajon, reformat e thella të ndërmarra për sundim të ligjit, ngritjen e nivelit të demokracisë dhe zhvillimin ekonomik, si dhe do të avokojë për përshpejtimin e procesit të anëtarësimit në Bashkimin Evropian si dhe nevojës së ndërmarrjes së veprimeve konkrete për ruajtjen e paqes dhe stabilitetit në Ballkanin Perëndimor”, thuhet në njoftim.