Kryetari i Prishtinës i jep “Çelësin e Qytetit” të mbijetuarit të gjenocidit të Srebrenicës

Kryetari i Prishtinës, Përparim Rama i ka dhuruar Çelësin e qytetit drejtorit ekzekutiv të Qendrës Përkujtimore në Srebrenicë (Bosnje dhe Hercegovinë) njëherësh i mbijetuari i këtij gjenocidi Emir Suljagiç.

Rama tha se dyert e kryeqytetit do të jenë gjithmonë të hapura për Suljagiç.

“Emiri është një prej pak të mbijetuarve të gjenocidit në Srebrenicë. Ai na nderoi sot me vizitë në institucionin e Kryeqytetit. Në shenjë të empatisë me vuajtjet e përjetuara dhe për të nderuar sakrificën e popullit boshnjak, i dhurova “Çelësin e Qytetit”. Gjenocidi në Srebrenicë shokoi gjithë botën si një prej krimeve të organizuara më barbare të shekullit 20. Prekazi, Reçaku, Meja e Krusha e Madhe janë përjetime të ngjashme të popullit tonë me atë të Srebrenicës.  Ne i përkujtojmë çdo ditë me dhimbje të gjitha viktimat e pafajshme të shkaktuara nga regjimi serb”, shkroi Rama.