Lajme

Zgjedhjet e BE-së nisin në Holandë

E enjte, 6 Qershor 2024 - 9:40 albinfo.ch

unsplash

Mësohet se vendvotimet janë hapur në Holandë të enjten për të nisur katër ditët e votimit në zgjedhjet parlamentare të Bashkimit Evropian, që mbahen në 27 vendet anëtare që pritet të sjellin fitore për të djathtën, përcjell albinfo.ch.

Holanda është i vetmi vend i BE-së që nis votimin e saj njëditor kaq herët, e ndjekur nga Irlanda të premten dhe pjesa tjetër e vendeve të BE-së, ku zgjedhjet pritet të mbahen gjatë fundjavës, raporton AP.

Rezultatet në mbarë Evropën do të shpallen të dielën në mbrëmje, pasi në të gjitha vendet anëtare të kenë përfunduar votimin.

Votimi holandez vjen gjashtë muaj pasi Partia për Liri e ekstremit të djathtë të Geert Wilders tronditi Evropën, duke u bërë partia më e madhe në Parlamentin kombëtar holandez.

Që nga zgjedhjet e fundit të BE-së pesë vjet më parë, partitë populiste, të djathta ekstreme dhe ekstremiste janë duke udhëhequr qeveritë në tri vende të BE-së, janë pjesë e koalicioneve qeverisëse në disa të tjera dhe duket se kanë mbështetje në rritje të publikut në gjithë kontinentin.

Zgjedhjet e BE-së janë të dytat më të mëdhatë në botë, pas atyre në Indi.

Pothuajse 400 milionë votues do të zgjedhin 720 anëtarë të Parlamentit Evropian nga përtej rrethit Arktik deri në skajet e Afrikës dhe Azisë. Ato do të kenë një ndikim në çështjet që variojnë nga politikat globale të klimës dhe mbrojtja tek migrimi dhe marrëdhëniet gjeopolitike me Kinën dhe Shtetet e Bashkuara.

Që nga zgjedhjet e fundit evropiane në vitin 2019, lufta ka shpërthyer në periferi të bllokut pas pushtimit të Rusisë në Ukrainë, një vend që dëshiron të anëtarësohet në BE.

Numri i anëtarëve të zgjedhur në çdo vend varet nga madhësia e popullsisë. Ai varion nga gjashtë për Maltën, Luksemburgun dhe Qipron, në 96 për Gjermaninë. Në vitin 2019, evropianët zgjodhën 751 ligjvënës. Pas largimit të Mbretërisë së Bashkuar nga BE-ja në vitin 2020, numri i eurodeputetëve ra në 705.

Disa nga 73 vendet e mbajtura më parë nga eurodeputetët britanikë ishin rishpërndarë tek shtetet e tjera anëtare.