Katër të vdekur dhe 23 të plagosur në një përplasje mes trenave në këtë shtet

Raportohet se të paktën katër persona humbën jetën dhe 23 të tjerë u plagosën pasi një tren pasagjerësh u përplas me një tren mallrash në Republikën Çeke, njoftuan autoritetet të enjten, përcjell albinfo.ch.

Ndërkohë, ministri i Brendshëm, Vit Rakusan, tha se përplasja ndodhi të mërkurën në mbrëmje vonë, në qytetin Pardubice – rreth 100 kilometra në lindje të Pragës.

Treni i udhëtarëve me shpejtësi të lartë i përkiste kompanisë private RegioJet.

Rakusan tha se asnjë nga të plagosurit nuk ishte në rrezik për jetë.

Ministri i Transportit, Martin Kupka, tha se rruga kryesore midis Pragës dhe pjesës lindore të vendit duhej të mbyllej, ndërsa autoritetet hetonin përplasjen.

“Ne nuk mund dhe nuk do të spekulojmë për shkakun e aksidentit”, tha Kupka.

Shkaku i aksidentit aktualisht po hetohet.

Kompania shtetërore e trenave, Hekurudhat Çeke, tha se binarët mund të qëndrojnë të mbyllur për gjithë ditën “për shkak të shkallës së aksidentit”.

Ekipet e shpëtimit thanë se më shumë se 300 pasagjerë ishin në trenin me shpejtësi të lartë që po shkonte për në qytetin e Kosice, në Sllovakinë lindore.

Të vdekurit nuk janë identifikuan ende. Drejtuesit e të dy motorëve mbijetuan, tha agjencia çeke e lajmeve.

Pas aksidentit, shtatëmbëdhjetë persona u pranuan në departamentin e urgjencës të spitalit Pardubice.

Kryeministri Petr Fiala e quajti aksidentin ‘një tragjedi të madhe’ dhe shprehu ngushëllimet e tij për familjet e të vdekurve.