Presidenca e Kosovës për letrën e dërguar në KiE: Qeveria nuk është konsultuar dhe dakorduar me presidenten

Vjosa Osmani, FB

Presidenca e Kosovës ka njoftuar se Qeveria e Kosovës nuk ishte konsultuar dhe dakorduar me presidenten e Kosovës, Vjosa Osmanin, për letrën e dërguar Asamblesë Parlamentare të Këshillit të Evropës. Në letër Qeveria e Kosovës është zotuar se deri në fund të muajit maj Kosova do ta shkruajë draft-statutin e Asociacionit.

Sipas Presidencës, Osmani përkrahë vetëm qëndrime dhe veprime paraprakisht të konsultuara, të koordinuara dhe të dakorduara me institucionin e Presidencës si institucion kushtetues me kompetenca të qarta në fushën e politikës së jashtme dhe si gardian i funksionimit kushtetues të institucioneve, transmeton albinfo.ch.

“Kjo letër nuk është e tillë. Mund të jetë konsultuar e koordinuar me individë jashtë institucioneve që sot e kanë publikuar këtë letër, por jo me Presidencën. Çdo derivat i letrës së zotimeve të nënshkruar nga tri institucionet duhet paraprakisht po ashtu të koordinohet dhe miratohet nga po këto tri institucione. Presidentja Osmani gjatë gjithë ditës po vazhdon konsultimet me aleatët rreth çështjes së anëtarësimit në Këshill të Evropës, ashtu siç ka bërë për një kohë të gjatë, me qëllim të zhbllokimit të këtij procesi.   Rrjedhimisht, Presidentja Osmani do ta mbështesë çdo veprim në drejtim të realizimit të këtij synimi, në përputhje të plotë me interesat shtetërore dhe Kushtetutën e Republikës së Kosovës. Prandaj edhe po bën përpjekje që shtetet anëtare të binden që sa më parë që të jetë e mundur të thirret një seancë e jashtëzakonshme ku do të votohet pro anëtarësimit të Kosovës në këtë organizatë”, thuhet në përgjigjen e presidencës për Klankosova.tv.