Policia e Kosovës ka sekuestruar mbi 10 kilogramë heroinë në Merdar

Policia e Kosovës ka njoftuar se ka sekuestruar 20 paketime të substancës së dyshuar, heroinë.

Drejtori i Antidrogës, Reshat Murseli, në një konferencë për media ka thënë se substanca e dyshuar u kap në Merdar, në një automjet me targa kroate, ku i dyshuari i kësaj vepre është arrestuar.

”Tek një automjet me targa kroate, hetuesit kanë hasur indikacione të dyshuara dhe kanë arritur që në pjesën në bagazh të kamofluar në gomën rezervë të automjetit të gjejnë 20 paketime të substancës së dyshuar narkotike të llojit heroine. Në derën e bagazhit po ashtu janë gjetura të fshehura para në vlerë 2.500 euro dhe një celular. Sipas provave të gjetura, është konstatuar se 20 paketime janë në peshë 10 kilogramë e 60 gramë substancë e dyshuar e llojit heroinë – të cilat tashmë janë sekuestruar, ngjashëm sikurse dhe vetura dhe mjetet e gjetura dhe celulari”, ka thënë ai, transmeton albinfo.ch.

Tutje është bërë e ditur se i dyshuari është arrestuar në vend të ngjarjes dhe pritet ndalimi, ndërsa kjo substancë sipas policisë, nga Kosova kishte destinacion vendet e Bashkimit Evropian.