Të enjten, takimi Bislimi-Petkoviq, në Bruksel, Lajçak: Shpresoj të kapërcejmë dallimet

Miroslav Lajčák

I dërguari i posaçëm i Bashkimit Evropian për dialogun Kosovë-Serbi, Miroslav Lajçak, ka thënë se shpreson që në takimin e të enjtes në Bruksel, mes kryenegociatorit nga Kosova, Besnik Bislimi dhe atij nga Serbia, Petar Petkoviq, do të arrihet të kapërcehet diferenca e mbetur.

Përmes një postimi në rrjetin social “Facebook”, ai ka shkruar se java para pushimit të Pashkëve ka qenë e shkurtër edhe pse intensive, transmeton albinfo.ch.

“Të hënën prita në Bruksel kryenegociatorët e Kosovës, zëvendëskryeministrin Bislimi dhe të Serbisë, drejtorin Petkoviq, për të vazhduar diskutimet tona për gjetjen e një zgjidhjeje të zbatueshme për njerëzit e prekur nga vendimi i Bankës Qendrore të Kosovës. Në përgjithësi, ka qenë një takim i dobishëm. Të dyja palët patën mundësinë të shpjegojnë idetë dhe qëndrimet e tyre”, ka shkruar Lajçak.

Lajçak ka deklaruar se të dyja palët patën mundësinë të shpjegojnë idetë dhe qëndrimet e tyre ndërsa ka shkruar se në fund konkluduan se do të nevojitet një takim tjetër.

“Të dy palët do të kthehen në Bruksel këtë javë dhe shpresoj se do të jemi në gjendje të kapërcejmë diferencën e mbetur të enjten”, ka shkruar ndër të tjera ai.