Shqipërisë i duhen 1.2 miliardë dollarë ushqime për turistët këtë vit, nuk ka prodhim vendas të mjaftueshëm

@pixabay

Ministria e Bujqësisë dhe Zhvillimit Rural në Shqipëri, duke u bazuar tek pritshmëritë për 14 milionë turistë që pritet ta vizitojnë vendin këtë vit, ka llogaritur se Shqipërisë i duhen 1.2 miliardë dollarë ushqime, transmeton albinfo.ch.

Kjo shifër është 220 milionë dollarë apo 24.4 për qind më e lartë se vitin e shkuar gjatë së cilit vendin e vizituan 10.5 milionë të huaj.

“Turistët duan prodhime shqiptare, po sa mundet bujqësia jonë të ushqejë turistët e huaj? Kapacitetet janë, por nuk janë mundësitë. Çfarë do të thotë kjo? Në gjithë shtetet e botës, bujqësia subvencionohet, ku më shumë e ku më pak, por gjithmonë më shumë se sa Shqipëria”, ka thënë Theodhor Kristuli, kryetar i Unionit Agroushqimor, shkruan A2CNN.

Njohës të këtij sektori, kanë vlerësuar se turizmi është një shans i mirë për bujqësinë, por me zhvillimet aktuale në bujqësi, veçanërisht ato në drejtim të financimit, më shumë se sa prodhimi vendas, të gjitha gjasat sinjalizojnë për zgjerim të importeve.

“Duke parë edhe pjesën e turizmit që po na rritet goxha, do të ishte një gjë e mirë për ne sikur të ktheheshin pak sytë te bujqësia. Do ndihmonte ekonominë, fermerët, pra të gjithë ne”, ka thënë tutje Kristuli.