Kosovë: Aktakuzë ndaj 18 personave, konfiskohen 184 mijë euro në rastin “Subvencionet V”

Prokuroria Speciale e Kosovës, ka ngritur sot aktakuzë në Gjykatën Themelore në Prishtinë, Departamentin Special, kundër 18 të pandehurve në rastin e njohur si “Subvencionet V”.

“Prokuroria Speciale njofton se aktakuza kundër të pandehurve të lartcekur është ngritur për veprat penale ‘Keqpërdorim i pozitës apo autoritetit zyrtar’ nga neni 414 KPRK-së, ‘Marrja e ryshfetit’ nga neni 421 të KPRK-së, ‘Dhënia e ryshfetit’ nga neni 422 të KPRK-së, ‘Ushtrim i ndikimit’ nga neni 424 të KPRK-së, si dhe ‘Mashtrim me subvencione’ nga neni 324 të  KPRK-së”, thuhet në njoftim, transmeton albinfo.ch.

Sipas njoftimit, aktakuza është ngritur kundër tetë të pandehurve si persona zyrtar, prej tyre katër të pandehur janë nga Ministria e Bujqësisë, Pylltarisë dhe Zhvillimit Rural, dy të pandehur zyrtarë nga Regjioni i Gjilanit në kuadër të AZHB-së, një zyrtarë në Komunën e Kllokotit, një zyrtarë në Komunën e Vitisë dhe ndaj dhjetë të pandehurve të tjerë qytetar.

Ndërkaq, Prokuroria Speciale ka propozuar që të konfiskohet dobia pasurore e sekuestruar nga të pandehurit e fituar me kryerjen e veprave penale në vlerë prej 184 mijë eurove.