Shaban Gogaj dënohet me 7 vjet e gjysmë burg, familjarët e Agonis Tetajt të zhgënjyer me vendimin

Gjykata Themelore e Pejës e ka dënuar përsëri Shaban Gogajn me shtatë vjet e gjysmë burgim për vrasjen e Agonis Tetajt.

Atij iu shqyrtua ky dënim për vrasje nga pakujdesia dhe armëmbajtje pa leje.

Në vitin 2019, vepra ishte rikualifikuar nga vrasje e rëndë me paramendim në vrasje nga pakujdesia, gjë që kishte nxitur edhe reagimin e familjes së Agonis Tetajt që kishin publikuar pamjet e rastit duke kërkuar kështu drejtësi për të birin.

Tashmë pasi është marrë vendimi i njëjtë sikur në gjykimin e parë, familjarët janë të zhgënjyer me vendimin e gjykatës.

“Unë nuk di ajo gjyqtare qysh e merr gjumi, qysh fle, qysh i këqyr fëmijët e vetë. Qysh e këqyrë fëmijën e vetë kur një dënim e ka dhënë me 7 vjet e gjashtë muaj, qysh mundet me kthye kryet e mi pa fëmijët e vetë e fëmijët Agonisi i ka lanë veç tri vjeç”, ka thënë tutje Nurie Tetaj, e ëma e Agonis Tetajt.

Prindërit e të ndjerit thonë që përmes avokatit të tyre do të apelojnë këtë vendim të shkallë së parë, derisa kërkojnë që të mos gjykohet në Pejë./Koha.net