SHBA akuzon Kosovën për nxitje të tensioneve me aksionet kundër strukturave paralele dhe dinarin

Ambasadori i Shteteve të Bashkuara të Amerikës, Jeff Hovenier, ka reaguar ashpër ndaj institucioneve të Kosovës për aksionet e fundit të Policisë së Kosovës për mbylljen e strukturave paralele serbe në Kosovë dhe për vendimin e Bankës Qendrore të Kosovës për dinarin.

Hovenier ka akuzuar Kosovën për nxitje të tensioneve ndëretnike.

“Qeveria e Shteteve të Bashkuara të Amerikës është thellësisht e shqetësuar për veprimet e fundit të autoriteteve të Qeverisë së Kosovës që kanë ndikim direkt dhe negativ në pjesëtarët e etnisë serbe dhe minoritetet e tjera në Kosovë. Këto veprime janë duke rritur në mënyrë të panevojshme tensionet ndëretnike dhe si pasojë kufizojnë opsionet që Shtetet e Bashkuara të shërbejnë si avokuese efektive për Kosovën në arenën ndërkombëtare”, thuhet në deklaratën e Hovenierit.

Ambasadori ka ka përmendur çështjen e mbylljes së objekteve të “institucioneve të administruara nga Serbia” në Dragash, Pejë, Istog e Klinë dhe zyrën e një organizate joqeveritare në Prishtinë. Po ashtu ka thënë se SHBA-ja është e shqetësuar për konfiskimin e dinarëve serbë dhe një veture që po bartte mjetet për t’i shpërndarë pagesat nga Serbia.

“Ne presim që autoritetet e Kosovës të sigurojnë se individët për të cilat ishin të dedikuara këto pagesa sociale, t’i marrin pa vonesa”, ka deklaruar Hovenier, duke shtuar se Qeveria e Kosovës ka përgjegjësi për shqetësimet e të gjithë qytetarëve.

Ai ka thënë se çështja e strukturave serbe duhet të përfshihen në dialog.