Rikthehet Motor Show në Gjenevë

Panairi Ndërkombëtar i Motorëve në Gjenevë (GIMS) do të kthehet në Zvicër për herë të parë që nga viti 2019, kur u detyrua të mbyllej për shkak të pandemisë Covid-19

Shfaqja do të zgjasë këtë vit nga 26 shkurti deri më 4 mars, me një fokus më kompakt, inovativ dhe elektrik dhe me më pak ekspozues.

“Pas katër vjetëve të fundit të vështira për shkak të krizës shëndetësore dhe pasojave të saj në industrinë e automobilave, Motor Show në Gjenevë është rikthyer”, tha Alexandre de Senarclens, i cili mori presidencën e GIMS qershorin e kaluar, shkruan Swissinfo, transmeton albinfo.ch.

“Më shumë se 20 ekspozues do të jenë të pranishëm në Gjenevë, ku do të zbulohen rreth 15 produkte të reja globale dhe rajonale”, tha drejtori i shfaqjes, Sandro Mesquita.

Fakti mbetet se shumë pak prodhues iu përgjigjën thirrjes, me përjashtim të dukshëm të Renault dhe Dacia, filialet e saj me kosto të ulët. Aktorët kryesorë të sektorit nuk do të jenë të pranishëm.

“Disa marka vendosën të mos vijnë, sepse nuk kishin produkte të reja për të prezantuar, të tjera për arsye strategjike apo financiare”, shpjegoi Mesquita. Sipas tij, “shfaqja është larguar nga agjendat e prodhuesve” pas mungesës së gjatë dhe tani duhet t’i kujtojë “kujtimet e mira”.

Ky edicion është reduktuar nga 11 në shtatë ditë me kërkesë të markave të automobilave, veçanërisht për arsye kostoje, transmeton tutje albinfo.ch.

Organizatorët ende shpresojnë të mirëpresin rreth 200,000 vizitorë – nga më shumë se 600,000 në 2019-ën. “Shfaqja do të jetë gjithashtu më kompakte, në tri salla, krahasuar me gjashtë apo edhe shtatë në të kaluarën”, tha Sandro Mesquita.

 

---