Çerek shekulli nga masakra e Reçakut, asnjë i dënuar

Sot bëhen 25 vjet që nga masakra e Reçakut, ku 45 civilë shqiptarë u vranë nga forcat policore ushtarake serbe.

Masakra e Reçakut është kthesa historike dhe vrasja në masë që shtyu Perëndimin të reagojë nga ndaljen e gjenocidit mbi civilët shqiptarë.

Shefi i misionit verifikues të OSBE-së, William Wallker, ishte pikërisht ai që për herë të parë e cilësoi si krim kundër njerëzimit.

Serbia përmes mjeteve të komunikimit masiv ka tentuar ta paraqesë masakrën e Reçakut si një operacion policor kundërterrorist, duke pretenduar se të vrarët ishin të armatosur.

Deri më tani askush nga ekzekutuesit apo urdhërdhënësit e kësaj masakre nuk është dënuar.

Ndërkohë, në Departamentin Special të Gjykatës Themelore në Prishtinë, në nëntor të vitit 2023, filloi gjykimi i parë në mungesë për krime lufte ndaj Çedomir Aksiq. Aksiq mes tjerash dyshohet edhe për pjesëmarrje në vrasjen e disa civilëve në Reçak. “Tanimë me hyrjen në fuqi të Gjykimit në Mungesë, besojmë se së shpejti Prokuroria Speciale do fillojë me ngritjen e aktakuzave në mungesë për masakrën e Reçakut”, tha Amer Alija nga Fondi për të Drejtën Humanitare.

Krerët shtetërorë të Kosovës, në 24-vjetorin e masakrës së Reçakut, patën njoftuar se Prokuroria Speciale e Kosovës ka lëshuar fletarrestime ndërkombëtare për 18 persona serbë që dyshohet për pjesëmarrje në kryerjen e masakrës së Reçakut.