Putin “kërcënon për probleme” pasi Finlanda mbylli kufirin

Keystone (AP Photo/RIA Novosti, Alexei Nikolsky, Presidential Press Service)

Presidenti i Rusisë, Vladimir Putin, ka paralajmëruar për “probleme” me Finlandën, teksa u shpreh se ka urdhëruar krijimin e një distrikti të ri ushtarak në rajonet kufitare me këtë vend.

Sipas mediave ndërkombëtare, deklaratat e tij vijnë ndërsa rriten tensionet mes dy vendeve, si rezultat i luftës së nisur të Rusisë në Ukrainë dhe vendimit të shpejtë të Finlandës për t’iu bashkuar NATO-s.

Para disa javëve, Finlanda i ka mbyllur tërësisht kufijtë me Rusinë, për shkak të rritjes së numrit të migrantëve. Finlanda i ka hapur për pak dy pika kufitare më herët gjatë kësaj jave, mirëpo më pas i ka mbyllur ato.

“Ne kemi dëshmi që tregojnë se për dallim nga e kaluara, autoritetet kufitare ruse jo vetëm që po i lejojnë njerëzit pa dokumente që të nisen drejt kufirit finlandez, por edhe janë duke iu ndihmuar vazhdimisht”, ka thënë ministrja e Jashtme finlandeze, Elina Valtonen, shkruan albinfo.ch.