Një turist i vrarë dhe një i plagosur në një sulm në Paris

@unsplash

Një turist dyshohet se është vrarë dhe një tjetër ka mbetur i plagosur nga një sulmues me çekiç pranë Kullës Eifel në Paris, raportoi sot “The Sun”, shkruan albinfo.ch.

Sipas raportimeeve, sulmi ka ndodhur teksa ata po ecnin nëpër lagjen e 15-të të kryeqytetit francez, të shtunën rreth orës 22:00.

Ministri i Brendshëm i Francës, Gerald Darmanin, konfirmoi se “kalimtarët” u sulmuan në zonën e Quai de Grenelle, ndërsa u tha se i dyshuari për këtë sulm është arrestuar dhe personi i plagosur po trajtohet nga shërbimet emergjente.

“Policia sapo ka arrestuar një sulmues që sulmonte kalimtarët në Paris, rreth Quai de Grenelle. Një person ka mbetur i vdekur dhe një i plagosur. Ju lutemi, shmangni zonën”, ka njoftuar ai përmes rrjetit social “Twitter”.

I dyshuari është shtetas francez dhe aktualisht ndodhet në paraburgim, ndërsa personi që vdiq ishte gjithashtu një turist me shtetësi të dyfishtë gjermane dhe filipinase dhe vdiq nga plagët me thikë të marra në shpinë dhe shpatull.

Ndërkaq, turisti britanik thuhet se pësoi një dëmtim në kokë pasi u sulmua me një çekiç.