Shqipëria do të fitojë miliona euro me pjesëmarrjen në Euro 2024

Shqipëria mbrëmë ka siguruar pjesëmarrjen e dytë në histori të saj në një Kampionat Evropian, përcjell albinfo.ch.

Kur kanë mbetur edhe një ndeshje deri në fund të kampanjës kualifikuese, Shqipëria zë vendin e parë në Grupin E me 14 pikë dhe automatikisht është kualifikuar për Euro 2024.

Në ndeshjen e fundit kuqezinjtë do të luajnë për prestigj ndaj Ishujve Faroe në shtëpi, për të festuar kualifikimin në Euro 2024.

Gjithsesi kualifikimi do t’i sjellë FSHF-së miliona euro nga pjesëmarrja në Kampionatin Evropian.

Vetëm pjesëmarrja në këtë garë do t’i sjellë FSHF-së një shifër prej 9.25 milionë eurosh.

Përveç kësaj, një fitore në fazën e grupeve vlen 1.5 milionë euro, ndërsa barazimet sjellin 750 mijë euro.

Por FSHF kishte vendosur që nga këto para, gjysmën, apo 4.5 milionë euro, t’i ndajë si shpërblim për lojtarët dhe stafin teknik.

Nga këto mësohet se shuma prej 3.5 milionë eurosh do t’u shpërndahet vetëm futbollistëve, ndërsa kontrata e Silvinjos në rast kualifikimi parashikon një premio prej 1 milion eurosh shtesë.