Policia publikon pamje nga grabitja në tentativë dhe përballja me të dyshuarit

Kosovo Police

Policia e Kosovës ka parandaluar një grabitje të armatosur në Ferizaj natën e së enjtes. Të premten ka dhënë detaje mbi rastin. Policia po ashtu ka publikuar dy video ku shihet përballja e tyre me të dyshuarit.

“Me datën 03.11.2023 rreth orës 04:50 kemi pranuar një informacion se në rrugën magjistrale Ferizaj-Prishtinë në afërsi të pikës së karburantit “Hib Petrol” në Ferizaj ishte një grabitje e armatosur në proces nga persona të panjohur. Patrulla e policisë me të arritur  në vendin e ngjarjes,  të dyshuarit kanë filluar të shtënë me armë zjarri në drejtim të veturës së policisë, duke dëmtuar në masë të madhe veturën zyrtare,  mirëpo dy policët që ishin në veturë nuk kanë pësuar ndonjë lëndim trupor, ndërsa në shkëmbim të armëve të zjarrit i janë përgjigjur edhe zyrtarët policor dhe të dyshuarit janë larguar nga vendi i ngjarjes me një veturë karavan,  ngjyrë e zezë,  në drejtim të panjohur dhe në veturë dyshohet se ishin 4 persona me armë të gjata”, thuhet në njoftim.

Tutje konfirmohet se cak i grabitësve ishin tre bankomate në zonë.

“Ekipe të policisë menjëherë kanë dalë në vendin e ngjarjes në asistim të patrullës së policisë, e më pas në vend të ngjarjes kanë dalë hetuesit dhe krimteknikët rajonal, të cilët nën autorizim të prokurorit kujdestar, i cili edhe ai ka dalë në vendin e ngjarjes, i kanë nisur hetimet. Gjithashtu në vendin e ngjarjes ka dalë edhe Njësia e Deminimit e Policisë së Kosovës. Nga hetimet e para hetuesit rajonal kanë mësuar se cak i personave të maskuar ishin 3 bankomatet që gjenden skaj rrugës magjistrale në parkingun e qendrës tregtare ” Superviva” në Ferizaj”, shton policia.

Mes tjerash janë dhënë edhe detaje të veprimeve të grabitësve.

“Personat e maskuar fillimisht me një mjet plasës kanë shpërthyer njërin bankomat, ndërsa kanë dëmtuar edhe dy bankomatët tjerë, mirëpo falë intervenimit të shpejtë të policisë, posa arrinë patrulla e parë policore, të dyshuarit fillojnë të shtënë në drejtim të veturës së policisë dhe të largohen nga vendi i ngjarjes. Nga të dyshuarit në këtë rast janë përdorur mjet eksplozivi në bankomat dhe pushkë automatike në drejtim të policëve në veturën e policisë”, thuhet në njoftim.

Ndërkohë, të dyshuarit ende janë në arrati nën dyshimin për Vrasje e mbetur në tentativë, grabitje e  armatosur e mbetur në tentativë dhe armëmbajtje pa leje, përcjell albinfo.ch.

https://fb.watch/o51WfaWzX_/