Kryeministri i Kosovës: Çështja e anëtarësimit të Kosovës në Këshillin Evropian, proces historik

Kryeministri i Kosovës, Albin Kurti, ka zhvilluar sot takim me raportuesen e Asamblesë Parlamentare të Këshillit të Evropës, Dora Bakoyannis.

Përmes një postimi në rrjetin social “Facebook”, Kurti ka njoftuar se në këtë takim është biseduar rreth anëtarësimit të Kosovës në Këshillin Evropian, shkruan albinfo.ch.

“Është nder dhe kënaqësi e madhe që t’ju mirëpres. Çështja e anëtarësimit të Kosovës në Këshillin Evropian është proces historik për vendin tonë. Ne besojmë që jemi në rrugën e duhur dhe po përpiqemi me aq sa dimë dhe mundemi që të bëjmë më të mirën në raport me vlerat themelore, demokracinë, sundimin e ligjit dhe të drejtat e njeriut, në mënyrë që gjithçka të shkojë mirë në të gjitha fazat e anëtarësimit”, ka shkruar ai.

Ndryshe gjatë ditës së sotme Bakoyannis u takua edhe me presidenten e Kosovës, Vjosa Osmani, dhe me zëvendësministrin e Punëve të Jashtme dhe Diasporës, Kreshnik Ahmeti.