Shqipëri: Kuvendi përjashtoi 11 deputetë, këta të fundit nuk e njohin vendimin

Vendimi i Kuvendit të Shqipërisë për të përjashtuar nga punimet 11 deputetë të PD-së, po sfidohet nga këta të fundit.

Ata kanë deklaruar se nuk e njohin dhe rrjedhinisht edhe nuk e respektojnë një vendim të tillë, duke bërë të ditur se nesër do të jenë në sallë.

“Nesër, e hënë, ora 17:00, është planifikuar seanca e radhës plenare. Pavarësisht vendimit të përjashtimit arbitrar, i cili parashikon përjashtimin tonë për 11 ditë, ne duhet të jemi të gjithë në seancë. Për këtë qëllim, mblidhemi të gjithë bashkë në orën 16:30 për të shkuar në grup në seancë”, thuhet në njoftimin e tyre, transmeton albinfo.ch.

Vendimi i Kuvendit për të përjashtuar për 10 ditë këta deputetë erdhi pasi ata penguan zhvillimin normal të seancës plenare, duke mos lejuar socialistët të hapin punimet me argumentin se sjellja e mazhorancës ndaj opozitës është në shkelje të të drejtave të saj kushtetuese.