Pas deklaratave të presidentit turk, Izraeli tërheq diplomatët nga Turqia

EPA/MOHAMMED SABER

Ministri i Jashtëm i Izraelit, Eli Cohen, ka njoftuar se janë tërhequr diplomatët nga Turqia për shkak se marrëdhëniet midis dy vendeve janë përkeqësuar.

“Duke pasur parasysh deklaratat e rënda që vijnë nga Turqia, unë kam urdhëruar kthimin e përfaqësuesve diplomatikë atje për të kryer një rivlerësim të marrëdhënieve midis Izraelit dhe Turqisë”, deklaroi ai, raporton “The Times of Israel”.

Tërheqja vjen pas deklaratave të Presidentit turk, Recep Tayyip Erdogan, i cili përsëriti pretendimet se Izraeli është një pushtues i Palestinës dhe se grupi militant Hamas nuk është terrorist, deklarata këto të bëra në një tubim propalestinez në Stamboll.

Presidenti turk sulmet e Izraelit në Gaza i quajti një “masakër”, teksa u shpreh se aleatët perëndimorë të vendit ishin fajtori kryesor, pas, siç tha ai, krimeve të luftës nga Izraeli.

“Izraelin ne do ta shpallim një vend kriminal lufte para botës. Ne po përgatitemi për këtë dhe do ta prezantojmë Izraelin në botë si vend kriminel lufte”, u shpreh ndër të tjera ai, përcjell albinfo.ch.