Rama: Për t’u lavdëruar që Kurti pranoi propozimin evropian për avancim të Asociacionit

Kryeministri i Shqipërisë, Edi Rama, ka reaguar pas takimit të sotëm të kryeministrit të Kosovës, Albin Kurti, që e ka zhvilluar me liderët evropianë.

Rama e ka përgëzuar Kurtin për, siç tha, pranimin e propozimit evropian për Asociacionin e Komunave me Shumicë serbe, shkruan albinfo.ch.

“Për t’u lavdëruar që Kryeministri i Kosovës ka pranuar propozimin e BE-së për të avancuar vendosmërisht drejt një zgjidhje zhbllokuese për Asociacionin përmes instrumenteve të vetëmenaxhimit si kornizë për negociatat në vijim”, ka shkruar ai në Twitter.

Tutje ai e quajti këtë moment të rëndësishëm.

“Ky më të vërtetë është një moment tepër i rëndësishëm. Krerët e Kosovës dhe Serbisë duhet të tregojnë lidership dhe të punojnë ngushtë me partnerët perëndimorë që të zbatohet me përpikëri Marrëveshja Bazë mbi normalizimin e marrëdhënieve, pa vonesa të mëtejme”, ka shtuar ndër të tjera ai.

Kryeministri shqiptar ka shkruar se rajoni meriton paqe, stabilitet dhe bashkëpunim për të ardhme më të mirë të përbashkët.