Komuniteti Shqiptaro-Amerikan proteston nesër para OKB-së

Komuniteti Shqiptaro-Amerikan ka njoftuar se nesër nga ora 13:00 do të protestojë para Selisë së Organizatës së Kombeve të Bashkuara në New York.

Sipas njoftimit për media, protesta do të zhvillohet për t’i dënuar aktet e vazhdueshme të terrorizmit dhe luftënxitëse të Serbisë, përcjell albinfo.ch.

“Të hënën, më 23 tetor 2023, Komuniteti Shqiptaro-Amerikanët u bëjnë thirrje Shteteve të Bashkuara të Amerikës dhe komunitetit ndërkombëtar që të përdorin të gjitha mjetet e nevojshme për ta detyruar Serbinë që t’i ndalojë dhe të përmbahet nga veprimet dhe politikat që janë duke e minuar stabilitetin e Kosovës dhe Ballkanit. Së fundmi, më 29 maj 2023, Serbia orkestroi protestat e dhunshme në veriun e Kosovës që rezultuan me sulme të paprovokuara ndaj forcës paqeruajtëse të NATO-s, KFOR”, thuhet në njoftim.

Tutje në njoftim përmendet sulmi i 24 shtatorit.

“Më 24 shtator 2023 terroristët dhe njësitë paraushtarake nga Serbia ndërmorën një sulm terrorist në Kosovë. Komuniteti Shqiptaro-Amerikan kërkon që Serbia dhe udhëheqësit e saj të mbahen përgjegjës, si dhe të gjithë të përfshirët në aktet e agresionit dhe terrorizmit të sillen para drejtësisë”, thuhet në komunikatë.

Ndër të tjera, në njoftim u tha se “rajoni i Ballkanit është një fuqi baruti”, dhe nëse nuk ndërhyhet, mund të ndizet një luftë e re.

“Rajoni i Ballkanit është një fuqi baruti. Nëse nuk ndërhyhet, mund të ndizet një luftë e re në zemër të Evropës, e që do të jetë një luftë shtesë me të cilën do të duhet të ballafaqohet komuniteti ndërkombëtar”, thuhet në njoftim.