OKB dërgon mjaftueshëm ujë për furnizimin e 22 mijë njerëzve për një ditë në Gaza

Foto nga arkiva (KEYSTONE/AP Photo/Fatima Shbair)

Agjencia e Organizatës së Kombeve të Bashkuara për fëmijë, UNICEF, ka njoftuar që përmes kalimit në Rafah, ka arritur të dërgojë furnizime të mjaftueshme me ujë për 22,000 njerëz për një ditë.

“Mbi 44,000 shishe me ujë të pijshëm të furnizuara nga UNICEF – mjaftueshëm për 22,000 njerëz për 1 ditë – u kaluan përmes Kalimit Rafah sot si pjesë e një kolone prej 20 kamionësh me Gjysmëhënën e Kuqe Egjiptiane, Organizatën Botërore të Shëndetësisë dhe Programin Botëror të Ushqimit”, thuhet në deklaratën e UNICEF-it, shkruan TCH.

Drejtoresha ekzekutive e UNICEF-it, Catherine Russell, ka thënë se shpërndarja e ujit do të shpëtojë jetë.

“Ky ujë i parë, i kufizuar do të shpëtojë jetë, por nevojat janë të menjëhershme dhe të mëdha – jo vetëm për ujë, por për ushqim, karburant, ilaçe dhe mallra dhe shërbime thelbësore. Nëse nuk mund të ofrojmë furnizime humanitare vazhdimisht, ne përballemi me kërcënimin e vërtetë të shpërthimeve të sëmundjeve kërcënuese për jetën”, shtoi Russell, përcjell albinfo.ch.

Sipas UNICEF, konflikti gati dyjavor ka shkaktuar dëme të rënda në sistemet e ujit dhe kanalizimeve të Gazës me kapacitetin e prodhimit të ujit aktualisht në 5% të niveleve normale.

“Afro 2.3 milionë banorë në Gaza tani po mbijetojnë me 3 litra ujë për person në ditë”, bën të ditur UNICEF.