Sveçla: Armatimi i sekuestruar zbardh planin e Serbisë për aneksimin e veriut

Policia e Kosovës gjatë ditës së sotme ka kryer bastisje në shtatë lokacione në veri të vendit, që lidhen me sulmin e 24 shtatorit, në Banjskë të Zveçanit.

Pas këtij operacioni përmes një postimi në rrjetin social “Facebook” ka reaguar ministri i Punëve të Brendshme, Xhelal Sveçla, i cili u shpreh se “vijon zbardhja e planit të strukturave terroriste të Serbisë për aneksimin e veriut të vendit tonë”, shkruan albinfo.ch.

“Armatimi i zbuluar sot bën pjesë në arsenalin e Zveçanit dhe Banjskës. Në kuadrin e aktivitetit policor, sot u zhvilluan bastisje në shtatë lokacione në veriun e vendit tonë”, ka shkruar ai.

Tutje, sipas tij, sekuestrimet qartësojnë planin e Serbisë për aneksimin e veriut.

“Granatahedhës dore, eksplozivë, mina kundër këmbësorisë, mina me sahat e teledirigjim, detonatorë e çanta me pajisje të ndryshme, prodhime të njëjta me ato që u sekuestruan në Banjskë dhe më herët në Zveçan, po qartësojnë për ne dhe për opinionin ndërkombëtar gjerësinë e planit të Serbisë për aneksimin e veriut përmes agresionit terrorist”, ka thënë ai.

Ndër të tjera, ai u shpreh se pandalshëm dhe me energji shtesë do të vazhdojnë deri në çrrënjosjen e terrorizmit kundër Republikës.