Franca nuk e mbështet vendimin për ndaljen e ndihmave për Palestinën

Keystone (Mohammed Badra, Pool via AP)

Gjermania, SHBA, Franca, Britania e Madhe dhe Italia u dakordësuan se Izraeli ka të drejtë të vetëmbrohet kundër sulmeve terroriste të Hamasit dhe thanë se po punojnë me fuqitë rajonale për të shmangur përshkallëzimin e mëtejshëm të situatës.

Këtë e tha kancelari gjerman, Olaf Scholz, gjatë një konference të përbashkët për shtyp me presidentin francez, Emmanuel Macron, në Hamburg. “U dakordësuam se dënojmë me termat më të ashpër aktin barbar të terroristëve ndaj civilëve të pafajshëm izraelitë. Jemi me Izraelin. U dakordësuam gjithashtu mbi nevojën se Izraeli ka të drejtë të vetëmbrohet kundër akteve çnjerëzore, por në të njëjtën kohë duhet shmangur përshkallëzimi”, tha Scholz, transmeton A2, përcjell albinfo.ch.

Kreu i Elizesë e cilësoi si të papranueshme duartrokitjen e Iranit për sulmin dhe tha se Franca po përpiqej të përcaktonte nëse Republika Islamike ishte e përfshirë në mënyrë direkte. “Nuk kam komente për të bërë lidhur me përfshirjen direkte të Iranit. Prova zyrtare nuk ka, por është e qartë se komentet publike të autoriteteve iraniane ishin të papranueshme dhe nuk korrespondojnë me vlerat dhe interesat tona”, tha presidenti francez.

Macron tha gjithashtu se Parisi nuk e mbështet pezullimin e ndihmave për popullsinë palestineze, duke përsëritur qëndrimin e shprehur më herët nga Ministria e Jashtme në Paris. “Nuk duhet të ngatërrojmë betejën kundër terrorizmit me të drejtat themelore të njeriut”, tha Macron.

Reagimi i tij erdhi pasi Komisioneri për Zgjerimin, Oliver Varhelyi, njoftoi të hënën se të gjitha fondet e destinuara për palestinezët do të pezulloheshin. Por Bashkimi Europian bëri më vonë një hap prapa, duke njoftuar se e tërhiqte vendimin.