Kurti: Lirimi i Radoiçiqit të kujton marrëveshjen e Pablo Escobarit me presidentin e Kolumbisë

Albin Kurti

Kryeministri i Kosovës, Albin Kurti, ka krahasuar lirimin e organizatorit të sulmit terrorist ndaj Policisë së Kosovës, Milan Radoiçiq, me marrëveshjen mes Pablo Escobar dhe shtetit të Kolumbisë.

“Arrestimi dhe lirimi i Radoiçiqit të kujton marrëveshjen e Pablo Escobarit me presidentin e Kolumbisë: Escobari, në fakt, pranoi të shkonte në burg me kusht që të vendosej në burgun e tij, të ndërtuar në mënyrë të pavarur, në të cilin do të kontrollonte komandantët dhe jo anasjelltas; gjoja do ta vuante dënimin atje”, ka thënë Kurti në një intervistë për media malazeze.

Ai po ashtu ka kërkuar ndëshkimin e Serbisë.

“Provat e mbledhura gjatë hetimeve të kryera tregojnë për përfshirjen e drejtpërdrejtë të institucioneve shtetërore të Serbisë në këtë akt agresioni kundër Republikës së Kosovës. Për këtë Serbia duhet të sanksionohet dhe të ndëshkohet ndërkombëtarisht. Nëse edhe ky akt mbetet i pandëshkuar, Serbia do ta përsërisë krimin”, është shprehur Kurti.

Kreu i Qeverisë se Kosovës ka kërkuar që terroristët e arratisur në Serbi t’u dorëzohen autoriteteve të Kosovës.

“Organizatat ‘Mbrojtja Civile’ dhe ‘Brigada e Veriut’ duhet të shpallen organizata terroriste nga vendet tona mike, partnere dhe aleate. Qeveria e Republikës së Kosovës tashmë e ka bërë këtë në seancën e 29 qershorit të këtij viti”, ka shtuar ai, përcjell albinfo.ch.