Drejtori i Policisë: Personat e tjerë të dyshuar për sulmin e së dielës kanë arritur të largohen në këmbë

Personat e tjerë të dyshuar për sulmin e ditës së diele në Banjskë të Zveçanit, të cilët nuk janë neutralizuar e as arrestuar, kanë arritur të largohen në këmbë, ka thënë në konferencën e sotme, Drejtori i Përgjithshëm i Policisë së Kosovës, Gazmend Hoxha.

Ai ka bërë të ditur se sulmuesit i kanë lënë prapa automjetet e tyre të përdorura gjatë sulmeve ndaj Policisë së Kosovës, përcjell albinfo.ch.

“Personat tjerë të dyshuar, që bazuar në pamjet e siguruara mund të ishin rreth 30 persona, kanë arritur të largohen në këmbë nga hapësirat brenda dhe përreth Manastirit të Banjskës, duke lënë prapa automjetet e tyre, që gjatë ekzaminimit në vendin e ngjarjes rezulton të jenë 24 automjete, një mjet i blinduar si dhe dy motorë me katër rrota”, ka thënë ai.

Hoxha ka deklaruar se ky është operacioni më i madh dhe më i rëndësishëm që nga paslufta për institucionin të cilin e drejton.