Hovenier: SHBA e mbështet Lajçkaun dhe Borrellin

Ambasadori i Shteteve të Bashkuara të Amerikës në Kosovë, Jeff Hovenier, tha se SHBA-ja ka besim në përfaqësuesin e lartë të Bashkimit Evropian, Josep Borrell dhe të dërguarin evropian, Miroslav Lajçak, si ndërmjetësues në bisedimet ndërmjet Kosovës dhe Serbisë.

“Shtetet e Bashkuara kanë besim të plotë në Bashkimin Evropian dhe rolin e tij në ndërmjetësimin e dialogut dhe kanë besim të plotë në përfaqësuesin e lartë (Josep) Borrell dhe përfaqësuesin e posaçëm evropian (Miroslav) Lajçak, si zbatues objektiv të kësaj politike”, tha ai, përcjell albinfo.ch.

Ai shton se dialogu i fasilituar nga BE-ja është rruga e vetme drejt normalizimit.

“Është e rëndësishme që të gjithë aktorët në këtë operacion, në këtë proces, të pranojnë procesin në të cilin janë, të luajnë poker me letrat që u kanë rënë dhe të kenë në mendje këtë pikëpamje, të punojnë për normalizimin e marrëdhënieve, për zbatimin e plotë të Marrëveshjes së Ohrit, nga të dyja palët”, tha ambasadori Hovenier.

Ambasadori Hovenier i bëri këto komente në hapje të Samitit të Paqes dhe Demokracisë, i organizuar nga organizatat e shoqërisë civile shqiptare dhe serbe me temën “Të ëndërrojmë (të pamundurën): Ballkani Perëndimor i lirë nga situata krize dhe në një rrugë drejt integrimit bashkëpunues”.