Zëdhënësi i BE-së: Masat ndaj Kosovës mund të lehtësohen, por edhe të shtrëngohen

Zëdhënësi i Bashkimit Evropian, Peter Stano, pas takimit të nivelit të lartë në kuadër të dialogut Kosovë-Serbi, që u zhvillua dje në Bruksel, ka thënë se takimi nuk ka dhënë rezultat, për shkak se palët nuk janë të gatshme të kapërcejnë dallimet e tyre.

Ai ka theksuar se Bashkimi Evropian nuk është palë në dialog dhe duke qenë ndërmjetësues, nuk mund të sjellë sukses nëse palët nuk arrijnë të gjejnë kompromis, përcjell albinfo.ch.

“Më lejoni t’ju kujtoj diçka që BE-ja nuk është palë në dialog. Palë në dialog janë Kosova dhe Serbia. BE-ja është lehtësues, bazuar në dëshirat e shprehura nga të dyja palët dhe miratuar nga e gjithë BE-ja. Ne po lehtësojmë që palët të kapërcejnë dallimet e tyre. Por, ne nuk do të jemi të suksesshëm kurrë nëse palët refuzojnë të shkojnë në rrugën e kompromisit”, ka thënë Stano.

Në lidhje me pyetjen se a do të ketë masa ndaj Kosovës dhe nëse do të ketë të tilla edhe ndaj Serbisë, ai ka thënë se ato do të vendosen ndaj secilës palë që nuk kontribuon në shtensionimin e situatës.

“Ka ende potencial për eskalim. Masat mund të kenë sukses për shtensionim. Masat ndaj Kosovës janë të përkohshme, të vendosura nga vendet anëtare që sipas tyre nuk duhet përdorur vetëm karotën, por edhe shkopin. Masat do të jenë aty për aq sa vlerësohet. Ato mund të lehtësohen, por edhe të shtrëngohen”, ka thënë ai.

Ai ka njoftuar se për takimin e djeshëm, i dërguari i posaçëm i BE-së për dialogun Kosovë-Serbi, Miroslav Lajçak, do t’i njoftojë të gjitha vendet anëtare të BE-së.