Pse mendohet që Kosova ka gjasa për kualifikim në “Euro 2024”?

E përditshmja spanjolle u jep shpresë "Dardanëve"

Së fundmi, gazeta spanjolle “Mundo Deportivo” ka shkruar në lidhje me incidentin që ndodhi në ndeshjen mes Rumanisë dhe Kosovës që u zhvillua të martën mbrëma në Bukuresht dhe i takoi kualifikimeve për “Euro 2024”, përcjell albinfo.ch.

Kujtojmë se ndeshja u ndërpre në pjesën e parë për 50 minuta, ku të dyja ekipet u larguan nga fusha pas shpalosjes së mesazhit “Kosova është Serbi” nga huliganët e grupit rumun “Uniti sub tricolor”.

Ndërkohë e përditshmja spanjolle ka shkuar edhe më larg se sa fakti që Rumania mund të gjobitet dhe të dënohet me dy ndeshje pa praninë e shikuesve. Sipas kësaj gazete, Rumania ka gjasa të humbë ndeshjen me rezultatin zyrtar 3:0, bazuar në nenin 14 të Kodit Disiplinor të UEFA-s.

“Nëse jo këtë të mërkurë, atëherë në ditët në vijim UEFA do të hapë një hetim të jashtëzakonshëm për incidentet që ndodhën mbrëmë në ndeshjen Rumani-Kosovë në Bukuresht”, ka shkruar gazeta spanjolle duke paralajmëruar sanksione të rënda për Rumaninë.

Gazeta ka cituar nenin 11 të Kodit Disiplinor të UEFA-s, i cili thotë se “federatat kombëtare janë përgjegjëse për ndërprerjen dhe braktisjen e fushës”.

Ndërkohë, neni 14 qartëson aktet raciste, ku thotë se “nëse një ose më shumë anëtarë të një federate fyen ose sulmojnë për arsye racore, fetare”, ata janë përgjegjës për mbylljen e pjesshme të stadiumit të tyre, përveç një gjobe. Për më tepër, neni 16 për rendin dhe sigurinë e UEFA-s, e bën përgjegjëse federatën organizatore për sjelljen e tifozëve të saj. Ndër të tjera, për përdorimin e “gjesteve, fjalëve apo çdo metode tjetër për të përcjellë një mesazh provokues” dhe veçanërisht atyre me nuancë politike, ideologjike apo fetare”, shkruan gazeta spanjolle, duke lënë të hapur mundësinë që ndeshja të regjistrohet me rezultatin zyrtar në favor të Kosovës.

Sa u përket 90 minutave, Rumania mposhti Kosovën 2:0 dhe tani “Dardanët” pothuajse s’kanë gjasa për kualifikim.

---