Kryeministri i Shqipërisë pret në takim presidenten e Kosovës

Foto Facebook: Presidenca e Republikës së Kosovës

Presidentja e Kosovës, Vjosa Osmani, është pritur në takim nga kryeministri i Shqipërisë, Edi Rama, ndërsa u tha se kanë diskutuar mbi të ardhmen e dy vendeve dhe rritjen e bashkëpunimit.

Në komunikatën nga Presidenca është bërë e ditur se Osmani është shprehur pro rrugës për një të ardhme më të ndritshme dhe më të integruar.

“Një bisedë përmbajtjesore rreth aspiratës së përbashkët evropiane të Kosovës dhe Shqipërisë. Duke punuar së bashku, Kosova dhe Shqipëria mund të hapin rrugën për një të ardhme më të ndritshme dhe më të integruar”, ka thënë ajo.

Ndër të tjera, ajo ka thënë se në raport me procesin e dialogut me Serbinë, Kosova është palë konstruktive, duke përmendur njohjen reciproke, ruajtjen e integritetit territorial, sovranitetit, rendit kushtetues dhe funksionalitetit institucional.

“Presidentja Osmani dhe kryeministri Rama shprehën optimizmin e tyre për të ardhmen e marrëdhënieve Kosovë-Shqipëri dhe vunë theksin në potencialin për rritje të bashkëpunimit në fusha të ndryshme të interesit të dyanshëm”, thuhet në njoftim.