Në Francë planifikohet ndalimi i cigares elektronike

@pixabay

Kryeministrja e Francës, Elisabeth Borne, ka deklaruar se planifikon t’i ndalojë cigaret elektrike njëpërdorimshe. Kjo për shkak të dëmtimit të shëndetit, veçmas te të rinjtë.

“Është çështje e rëndësishme për shëndetin publik”, ka thënë Borne për radion RTL.

Tutje ajo ka shtuar se cigaret njëpërdorimëshe, të njohura me termin “puff”, mund të krijojnë shprehi që çojnë në varësi nga cigarja. E si parandalim për 75.000 vdekjet e shkaktuara brenda një viti nga cigaret në Francë, kryeministrja ka njoftuar se janë duke hartuar plane kombëtare për luftim të cigares.

Franca tash e një kohë është në përpilim të këtyre planeve. Presidenti Emmanuel Macron para dy viteve kishte premtuar se janë duke punuar në krijimin e më shumë hapësirave publike, ku nuk pihet cigarja. Gjithashtu ai kishte thënë se deri në vitin 2030 do të arrijnë që 20-vjeçarët e Francës mos të jenë konsumues të cigares.