Kosova ende s’arrin të gjejë zgjidhje për t’u bërë pjesë e sistemit të Kartonit të Gjelbër

Në pamundësi të anëtarësimit Në OKB, Kosova kea mbetur peng i hyrjes në sistemin e Kartonit të Gjelbër duke mbetur kështu vendi i vetëm në Evropë që është jashtë këtij sistemi edhe pse i ka të plotësuara kushtet që kërkohen.

“ Byroja e Kosovës i ka të rezervuara rreth 7 milionë euro edhe pse kjo shumë është më e madhe se ajo që kërkohet nga Këshilli i Byrove, mirëpo duke qenë se nuk jemi pjesë e OKB-së nuk po mundemi të bëjmë zgjidhje për sa i përket Kartonit të Gjelbër”, tha drejtori i Byrosë Kosovare të Sigurimit Sami Mazreku për televizionin publik të Kosovës, transmeton albinfo.ch.

Edhe përpjekjet për anëtarësim përmes një shteti të tretë kanë dështuar dhe kjo sipas Mazrekut ndodhi për shkak të problemeve politike.

“Ne kemi tentuar përmes një shteti tjetër mirëpo Këshilli i Byrove po thotë ju keni probleme politike. Duke qenë se Kosova është shtet i ri dhe ka probleme me mosnjohje nga disa shtete përreth po ashtu ka probleme politike të cilat nuk e kanë mundësuar që Kosova të jetë pjesë e OKB-së. Ne jemi angazhuar që gjatë këtyre dy viteve ato që janë teknike t’i plotësojmë”, theksoi Mazreku.

Ai shpreson në gjetjen e ndonjë varianti tjetër për të qenë pjesë e këtij Këshilli.