Aktivizohen njësitet emergjente për shuarjen e zjarreve në Shqipëri

Ministri i Mbrojtjes në Shqipëri, Niko Peleshi, ka njoftuar se 100 efektivë të Forcave të Armatosura, katër mjete dhe helikopteri janë angazhuar për shuarjen e zjarreve, përcjell albinfo.ch.

Ai shton se situata po monitorohet pasi që mbeturinat po vazhdojnë të digjen.

“Po shkon drejt shuarjes përfundimtare zjarri në malin e Shpiragut, ku 100 trupa dhe helikopteri Cougar i Forcave i Armatosura janë angazhuar maksimalisht prej dy ditësh për neutralizimin e plotë të flakëve. Është nën kontroll vatra, në fshatin Rrilë, njësia administrative Shënkoll, në Bashkinë Lezhë, në vendgrumbullimin e mbetjeve urbane. Zjarri është shuar dhe situata po monitorohet pasi mbeturinat mund të vazhdojnë të digjen në brendësi pa u shfaqur në sipërfaqe”, ka njoftuar ai, përcjell albinfo.ch.

Po ashtu, ministri i Mbrojtjes tha se është riaktivizuar zjarri në Theth.

“Në fshatin Bushat, në Vaun e Dejës, zjarri në një sipërfaqe me mbeturina është shuar plotësisht dhe zjarrvënësi është shoqëruar nga efektivët e Policisë së Shtetit”, ka deklaruar ministri, përcjell albinfo.