Vdes një pacient në Psikiatri, helmohen nga tymi mjekët dhe infermierët

Një pacient i ka vënë zjarrin një prej dhomave më Repartin e Urgjencës dhe Intensives Psikiatrike në QKUK, të mërkurën mbrëma.

Nga Shërbimi Spitalor i Kosovës kanë njoftuar se pacienti ka vdekur për shkak të tymit.

“Mbrëmë rreth orës 23:00, në Repartin e Urgjencës dhe Intensives Psikiatrike ka ndodhur një zjarr, në njërën nga dhomat e tipit të mbyllur, ku qëndrojnë pacientët përkohësisht, pacientë në gjendje të agresivitetit dhe agjitimit të theksuar psikomotor, jo koshient për gjendjen mendore. Në të njëjtin Repart, në të njëjtën kohë, dyshohet se një pacient i ka vënë zjarrin në rrethana të panjohura dhomës së tipit të mbyllur, me ç’rast si pasojë e ngulfatjes nga tymi (asfiksioni) ai ka humbur jetën, përkundër përpjekjeve maksimale të stafit shëndetësor për ta shpëtuar pacientin”, ka njoftuar SHSKUK-ja, përcjell albinfo.vh.

Po ashtu nga tymi janë helmuar dy mjekë dhe dy infermierë.

Rasti është duke u hetuar nga njësitet përkatëse të Policisë së Kosovës.

“Sot rreth orës 00:15, është raportuar se në klinikën e Psikiatrisë në Prishtinë, një dhomë është përfshirë nga zjarri. Policia dhe prokurori i shtetit menjëherë ka dalë në vendin e ngjarjes, po ashtu janë ftuar edhe zjarrfikësit të cilët kanë lokalizuar zjarrin. Si pasojë e zjarrit në këtë rast, një person ka vdekur si dhe pesë të tjerë kanë pranuar tretman mjekësor”, ka thënë zëdhënësja e Policisë për rajonin e Prishtinës, Flora Ahmeti, përcjell albinfo.ch.