Pse po largohen infermierët nga Klinika e Ortopedisë në QKUK

Ilustrim

Drejtori i Klinikës së Ortopedisë në QKUK, Gani Jashanica, ka thënë se pavarësisht angazhimit të shtatë infermierëve të rinj, janë duke u përballur me largimin e tyre, pasi ai thotë për shkak të punës së rëndë në këtë klinikë.

Jashanica ka sqaruar se pacientët që trajtohen në shumicë e rasteve janë të palëvizshëm e kërkojnë kujdes të vazhdueshëm, shkruan Ekonomia Online.

Sipas tij, infermierët, ose po kërkojnë punë më të lehtë brenda Klinikës ose largohen tërësisht.

“Mungesë të mjekëve nuk ka, ka pasur mungesë të motrave, mirëpo fal konkursit të fundit, jemi përkrahur me shtatë infermiere të reja, e cila sado kudo do ta zbusë situatën dhe kemi ikje shumë të madhe të stafit të mesëm tek në për arsye se puna në Ortopedi është punë e rëndë dhe trajtohet një nga punët me të rënda në QKUK, për arsye se pacientët tanë janë të palëvizshëm dhe kërkojnë tretman të përhershëm, jo diagnostit, jo operativ, jo postoperativ”, u shpreh ai, përcjell albinfo.ch.

“Kështu që infermierët detyrohen të largohen, për shkak punës së madhe largohen, ose kërkojnë punë më të lehtë brenda Klinikës ose largohen”, nënvizon Jashanica.

Tutje njoftoi se në ditë kryhen rreth 15 operacione e trajtojnë deri në 100 pacientë.

“Në Ortopedi është një numër mjaft i madh, në ambulantat specialistike trajtohen diku 150 deri 200 pacientë, kurse në emergjencë përafërsisht 100 pacientë çdo ditë. Kurse në sallat operative përafërsisht 10 deri 15 operacione kryhen brenda ditës”, tha Jashanica për Ekonomia Online.

Kushtet e punës ai i quan solide, por që pret të dalin në objekt të ri. Edhe për barnat tha se e kanë gjetur mënyrën që të tejkalojnë mungesat.

“Kushtet mund të them që janë solide për arsye se kemi filluar me salla te reja edhe përkundër problemeve që kanë dalë me klimatizim e me nxehje. Mirëpo falë menaxhmentit të ri, këto probleme janë larguar dhe mendojmë që brenda dy muajve të kalojmë tërësisht në Klinikën e re dhe atje t’i kemi kushte optimale për punë. Ndërsa sa u përket barnave ka pjesërisht barna, kemi raste kur kemi mungesë të barnave, mirëpo kemi gjetur mënyrën se si t’i tejkalojmë këto”, tha drejtori i klinikës, përcjell albinfo.ch.