Vrasjet në lokale, Kurti: Vettingu është domosdoshmëri

Kryeministri i Kosovës, Albin Kurti ka folur pas vrasjeve të fundit në Kosovë që ndodhën në javën e fundit.

Ai thotë se personat që kërkohen nga drejtësia dhe pastaj lënë viktima tregon nevojën e domosdoshme për vetting në sistemin e drejtësisë.

“Reforma është domosdoshmëri e vettingu është zgjidhja. Tash e 5 muaj jemi në pritje që Gjykata Kushtetuese t’i hap sa më shpejtë rrugë jetësimit të kësaj reforme. E koha po kalon. Koha që kalon është kohë e humbur”, u shpreh Kurti.

Ai shton se sistemi i drejtësisë është duke dështuar.

“Janë të shumta rastet kur si pasojë e mosveprimit të sistemit të drejtësisë, persona të ndryshëm me precedentë të shumtë penalë, lëvizin lirshëm, qoftë të liruar nga organet apo edhe të pandjekur fare penalisht, e të cilët rrezikojnë dhe marrin jetën e qytetarëve tanë. Edhe raporte të ndryshme kredibile vendore dhe ndërkombëtare, konstatojnë se drejtësia jonë vazhdon të jetë jo-efikase dhe e ngadaltë dhe të përshkruhet me fenomenin e rasteve të shumta në rigjykim dhe vendimeve jo të duhura ndëshkimore”, u shpreh Kurti, në mbledhjen e qeverisë, përcjell albinfo.ch.