Papa Françesku, thirrje për masa urgjente për të luftuar ndryshimet klimatike

Papa Françesku tha të dielën se vala e fundit e të nxehtit në shumë pjesë të botës dhe përmbytjet në vende si Koreja e Jugut tregojnë se duhen ndërmarrë veprime më urgjente për të luftuar ndryshimet klimatike.

“Ju lutem, përsëris thirrjen drejtuar udhëheqësve botërorë për të bërë diçka më konkrete për të kufizuar çlirimin e gazeve ndotëse”, tha Papa në fund të mesazhit të tij drejtuar besimtarëve në Vatikan.

“Është një sfidë urgjente, nuk mund të lihet pas dore, ka të bëjë me të gjithë. Le të mbrojmë shtëpinë tonë të përbashkët,” shtoi Papa.

Ati i Shenjtë i ka bërë thirrje botës që të heqë dorë shpejt nga lëndët djegëse fosile dhe e ka bërë përparësi mbrojtjen e mjedisit.

Të dielën, ai shprehu solidaritetin me ata që po vuajnë nga kriza klimatike dhe ata që po luftojnë efektet e saj.

Pjesë të jugut të Shteteve të Bashkuara po përballen me një valë të nxehti rekord, ndërsa temperatura ekstreme janë regjistruar edhe në Kinë dhe Evropën Jugore, përfshirë Italinë dhe Greqinë.

Një zjarr që shpërtheu në ishullin grek të Rodosit detyroi mijëra turistë dhe banorë të ishullit të strehoheshin në shkolla dhe stadiume të mbyllura të dielën pasi u evakuuan nga fshatrat bregdetare dhe vendet turistike./VOA