Kurti: Kemi reduktuar policinë, po hapim rrugë për zgjedhje në veri

Albin Kurti, FB

Kryeministri i Kosovës, Albin Kurti, ka thënë se Kosova po bëhet gati për zgjedhjet e parakohshme në Veri të vendit.

“Që nga java e kaluar, ne kemi reduktuar praninë e Policisë së Kosovës me 25% në 3 godinat e komunave veriore. Tani po fillojmë të hapim rrugën për zgjedhje të parakohshme. Kosova tashmë po zbaton me mirëbesim marrëveshjen me BE/EUSR për depërshkallëzimin e arritur në Bratislavë”, ka shkruar Kurti, përcjell albinfo.ch.

Ky njoftim i tij vjen një ditë pas takimit me emisarin e Bashkimit Evropian, Miroslav Lajçak, në Greqi, ku është diskutuar për shtensionimin e situatës në veri të Kosovës.

Kurti po ashtu, javë më parë ka insistuar se rruga e vetme deri te zgjedhjet në katër komunat veriore është përmes peticionit nga qytetarët serbë, duke shtuar se kryetarët shqiptarë nuk japin dorëheqje, përcjell albinfo.ch.