Kosovë: Pesë ministra e një zëvendësministër po hetohen nga Task Forca Anti-korrupsion

Pesë ministra dhe një zëvendësministër i Qeverisë së Albin Kurtit janë duke u hetuar nga Task Forca Anti-Korrupsion e Policisë së Kosovës.

Betimi për Drejtësi shkruan se ministri i Financave, Hekuran Murati, po hetohet për dëmtim të mësimdhënësve, ku dyshohet se jashtligjshëm ua ka ndërprerë pagesat gjatë grevës.

Murati është ftuar nga Task Forca që të intervistohet në hetuesi në cilësinë e të dyshuarit, por ai ka refuzuar, duke kërkuar që të intervistohet në zyrë të tij. Hetuesit e Task Forcës nuk e kanë pranuar kërkesën e Muratit, përcjell albinfo.ch.

Ministrja e Punëve të Jashtme, Donika Gërvalla, së bashku me zëvendësministren Liza Gashi dyshohen për dhënien e 1 milion e 40 mijë eurove për “Caritasin Zviceran”, ku kjo e fundit ka angazhuar për kryerjen e shërbimeve OJQ-në Germin, në të cilën Liza kishte qenë drejtoreshë para se të bëhej zëvendësministre. Deri tash i janë paguar “Caritasit 344 mijë euro, shkruan Betimi për Drejtësi.

Ndërkohë, ministri i Pushtetit Lokal, Elbert Krasniqi, po hetohet për keqpërdorim të detyrës zyrtare, për shkak se dyshohet se në një rast ku në mënyrë të kundërligjshme rreth 300 mijë euro janë shpenzuar për projekte për minoritetet.

Ministrja e Ekonomisë dhe Ndërmarrësisë, Rozeta Hajdari, po hetohet nën dyshimin se keqpërdorim të detyrës zyrtare për shkak të keqpërdorimit të rezervave shtetërore, përkatësisht në lidhje me blerjen e miellit dhe vajit, për të cilat është dëmtuar buxheti i shtetit, përcjell albinfo.ch.

Ministri i Kulturës, Hajrullah Çeku, bashkë me disa zyrtarë është intervistuar tashmë nën dyshimin se janë dhënë një kontratë për konsulencë në vlerë mbi 130 mijë euro, ku konsulenti i angazhuar si arkitekt vendor paguhet 5 mijë e 550 euro në muaj.

Nga Ministria e Infrastrukturës, zëvendësministri Hysen Durmishi po hetohet në lidhje me tenderin e tiketave, për të cilin pas nënshkrimit, ishte zmbrapsur, shkruan Betimi për Drejtësi.