Ulen tensionet në Francë

Keystone (AP Photo/Michel Euler)

Përfaqësues nga të gjitha grupet parlamentare dhe ministra të shumtë u thirrën për bisedime nga kryeministrja e Francës.

Gjithçka u bë në kuadër të përpjekjeve për të kërkuar një përgjigje për 6 netët e dhunës, që shpërthyen pas vdekjes së 17-vjeçarit Nahel, i vrarë nga policia javën e kaluar.

“Diskutuam një numër çështjesh mbi politikat qytetare, rolin e shkollave, autoritetin e prindërve dhe përgjegjësitë e tyre. Duhet të reflektojmë mbi këto çështje, kjo është ajo çfarë ka thënë edhe presidenti i Republikës. Sot është koha të rikthehet rendi”, tha Elisabeth Borne, kryeministre e Francës. Më herët, një akt solidariteti u shpreh në mbështetje të kryebashkiakut, shtëpia e të cilit u sulmua me një makinë të cilës i ishte vënë zjarri.

“Në të vërtetë është demokracia që është sulmuar, çdo simbol i saj është vënë në shënjestër; bashkitë po sulmohen, zyrtarët e zgjedhur po ashtu, mësuesit, forcat e policisë dhe shërbimet e emergjencës po sulmohen çdo ditë”, u shpreh Vincent Jeanbrun, kryetar bashkie.

Disa mijëra policë vazhdojnë të vendosen në mbarë Francën. Autoritetet shpresojnë që situata të ketë ndryshuar pas dy netësh relativisht të qeta.

Ndërkohë, presidenti Macron ka në plan një takim me 220 kryetarë bashkish të qyteteve dhe zonave të dëmtuara në ditët e fundit.