9 vjet nga bllokimi i urës së Ibrit me “Parkun e Paqes”

Parku i Paqes mbi lumin Iber

Një ditë pas heqjes së barrikadës mbi urën kryesore të lumit Ibër në Mitrovicë, më 18 qershor 2014 sërish serbët e veriut bllokuan urën, me të ashtuquajturin “Parku i Paqes”.

Kryetari i Mitrovicës së Veriut, Goran Rakiq, kishte thënë atëherë se veprimin për ribllokimin e urës po e merr në koordinim të plotë me qeverinë e Serbisë.

I pranishëm gjatë gjithë aksionit ka qenë edhe shefi i zyrës së qeverisë serbe për Kosovën, Marko Gjuriq, shkruan kosovapres.

Forca të shumta policore as nuk kishin tentuar të parandalojnë bllokimin. Ndërkohë, kryetari i pjesës veriore e ka ftuar atë të pjesës jugore, Agim Bahtirin, që pjesën tjetër të urës së Ibrit ta shndërrojë po ashtu në park.

“Parku i Paqes” është hequr dy vjet më vonë, konkretisht më 14 gusht të vitit 2016. Heqja është bërë pas implementimit të marrëveshjes nga dialogu Beograd-Prishtinë lidhur me urën në Mitrovicë, përcjell albinfo.ch.