Kurti nuk e ka ndarë mendjen për takimin në Bruksel

Kryeministri i Kosovës Albin Kurti, nuk e ka ndare ende mendjen nëse do të shkojë në Bruksel për takim të nivelit të lartë me presidentin e Serbisë, Aleksandar Vuçiq, pas ftesës së shefit të Politikës së Jashtme të Bashkimit Evropian, Josep Borrell, i cili paralajmëroi një takim për menaxhimin e krizës.

Kryeministri Kurti mbajti një qëndrim sfidues ndaj ftesës së zotit Borrell.

“Nuk kam vendosur ende, por do ta njoftoj me kohë zotin Borrell, sepse nuk na ka ftuar për sonte por javën e ardhshme”, theksoi ai, duke e cilësuar të çuditshme ftesën për takim, pak pasi zoti Borrell e kishte refuzuar një plan të Kurti për uljen e tensioneve në veri, shkruan Zëri i Amerikës.

Tutje thotë se ai vetë ka kërkuar takim i pari.

“Kur kërkova unë që të takohemi në Bruksel ai më tha se së pari na duhet shtensionimi. Menjëherë pas rrëmbimit të tre policëve, zoti Borrell, kërkoi takim të nivelit të lartë. Kur tensionet janë rritur mora ftesën për takimin e nivelit të lartë”, tha kryeministri Kurti, përcjell albinfo.ch.

Kurti është shprehur i gatshëm për organizimin e zgjedhjeve të reja në komunat më shumicë serbe në veri të Kosovës, por së pari tha ai, duhet të vendoset sundimi i ligjit.

“Nuk do t’ia dorëzoj republikën demokratike një milicie fashiste dhe ekstremistëve të dhunshëm”, tha ai.